محەممەد مەلا فایەق

محەممەد فایەق سەعید ناسراو بە محەممەد مەلا فایەق (لەدایکبووی ١٩٧١ لە سلێمانی) مەلا و نووسەرێکی ئیسلامیی کوردە.

محەممەد مەلا فایەق شارەزووری

بڕوانامەی بەکالۆریۆسی لە زانستە ئیسلامییەکاندا لە بەغدا بەدەست ھێناوە، و ئێستا لە یەکێک لە قوتابخانەکان مامۆستای زمانی عەرەبیە، وانەی زمانی عەرەبی و پەروەردی ئیسلامی گوتووەتەوە و‌ خەریکی گوتنەوەی وانەی ئایینیش بووە. لە ٢٠١٣وە تا ئێستا وتاربێژی مزگەوتی حاجی عەباسی باراوییە لە گەڕەکی قڕگە لە سلێمانی.

کەسایەتی

مامۆستایەکی ناودار و بەتوانای کوردستانە، سیمایەکی نوورانی و ئارای هەیە و هەمیشە بە جلوبەرگی کوردییەوە دەردەکەوێت، دەنگ و ڕەنگێکی کاریگەری هەیە، لەگەڵ کێش و سەروای چیرۆکەکاندا یاری بە چینە دەنگییەکانی و سەروای دەربڕینی دەکات. باوکی زانایەکی گەورەی کوردە و سەر بە ئەهلی تەسەوفە بەڵام جیاواز لە ڕێچکە و ڕێبازی باوکی، خۆی بە ئەهلی سەلەفی ساڵح دەزانێت و سەرەڕای ئەمانەش مامۆستا محەمەد هیچ دەستە و گرووپێکی دیاریکراوی دروست نەکردووە و ئاڕاستەیان بکات و بەرنامەیان بۆ دابنێت، بەڵکوو وەک خۆی دەڵێت ئەوەی لە بەرژەوەندی ئایینی خودا و موسڵماناندا بێت لەسەر سەکۆکەیەوە دەریدەبڕێت و موسڵمانانیش ئازادن لە جێبەجێکردنیان. خاوەنی کەناڵێکی یوتیوب و کۆمەڵێک تۆڕی کۆمەڵایەتی گەورەیە و لەو ڕێگەوە وتار و ئامۆژگارییەکانی بڵاودەکاتەوە و ڤیدیۆکانی پڕبینەرترینن و هەوادارێکی زۆرباشیان هەیە.

نەخۆشکەوتن

لە ڕۆژی هەینی ٢/١٠/٢٠٢٠ مامۆستا محەمەد تووشی ڤایرۆسی کۆرۆنا بوو، تووشی لەرز و هەناسەتەنگی و هەندێک جاریش پێویستی بە ئۆکسجین دەکرد، دوایی مانەوەی لە نەخۆشخانە و وەرگرتنی چارەسەری پێویست تەندروستی بەرەو باشتر ڕۆشت و گەڕایەوە بۆ کاری وتاربێژی

بەرھەمەکان

مامۆستا محەمەدی مەلا فایەق شارەزووری خاوەنی چەندین کتێب و بەرھەمی نوسراوە، نموونەی کتێب و بەرھەمەکانی:

• ١. ژیانی پێغەمبەرم محەمەد لە قورئان و سوننەتدا لە ٣ بەرگ پێکھاتووە
• ٢. زنجیرەی ژیانی دوای مردن کە پێکھاتووە لە ٤ بەرگ:
• ٣. مردن و ژیانی نێو گۆڕ لە قورئان و فەرموودە سەحیحەکاندا
• ٤. ڕۆژی دوایی لە قورئان و فەرموودە سەحیحەکاندا
• ٥. بەھەشت لە قورئان و فەرموودە سەحیحەکاندا
• ٦. دۆزەخ لە قورئان و فەرموودە سەحیحەکاندا
• ٧. نیشانەکانی دووڕوو لە قورئان و فەرموودە سەحیحەکاندا
• ٨. زەواج لە قورئان و فەرموودە سەحیحەکاندا
• ٩. ئارامگرتن لە قورئان و فەرموودە سەحیحەکاندا
• ١٠. خۆبەزلزانین و خۆبەکەمزانین لە قورئان و فەرموودە سەحیحەکاندا
• ١١. مافەکانی دراوسێ لە قورئان و فەرموودە سەحیحەکاندا
• ١٢. ئەو گوفتار و ڕەفتارانەى پێغەمبەر محەمەد ﷺ خۆشیویستوون و ڕقی لێیان بووە
• ١٣. نیشانەکانی حەجی وەرگیراو
• ١٤. ئامۆژگاریەکانی حەجی ماڵاوایی
• ١٥. ئادابەکانی قوربانی
• ١٦. ئادابەکانی کۆڕ و دانیشتن
• ١٧. باشترین کارەکانی موسوڵمانان کامەیە؟
• ١٨. چۆنیەتی ئەنجامدانی عەمرە
• ١٩. گەورەییی دوو شارە پیرۆزەکە مەککە و مەدینە
• ٢٠. ئاکار و ڕەفتار و ھەڵسوکەوتەکانی پێغەمبەر

بەستەرە دەرەکییەکان

• وێبگەی فەرمی