شاوەیس ناسراو بە کۆشکی (نیوەی یەکەمی سەدەی نۆزدەیەم لە گوندی کۆشک، قەرەداغ – ١٨٨٢) شاعیرێکی کورد بوو. شاوەیس لە دواییدا ناوی گوندەکەی خۆی کردووە بە نازناوی شیعری. لە ناو خەڵکدا بە مەلا شاوەیس ناوبانگی دەکردووە. قۆناغەکانی حوجرەی مزگەوتی تەواو کردووە، لەبەر ئەوە مەلایان پێ وتووە. شاعیر لە ساڵی ١٨٨٢ کۆچی دواییی کردووە.
| دێت و دەچێتە پاشەوە قەتلی خەلق بە ڕوو دەکا | | شەرمی حوزووری غالیبە تەقیەیی ڕووبەڕوو دەکا |
| خوێن بەری چاوی گرتووە عاشقی ھێندە کوشتووە | | دەست دەوەشێنێ ڕاست و چەپ نە یەک نە سێ نە دوو دەکا |
| لادە لە سەروو و بوون لەشی بێ سەمەر و نەتیجەیە | | قامەتی نەخلی دلبەرم شکۆفە زوو بە زوو دەکا |
| کەللەیی پڕ لە بادەیە دڵی چ ساف و سادەیە | | مەستە جنێوی خۆی دەدا نە فەرقی من نە توو دەکا |
| ڕوویی فریبی دڵ دەدا ڕەنگی لە ڕەنگی گوڵ دەدا | | خوویی شکستە مل دەدا وەختی شەرم کە خوو دەکا |
| ھەرچی ڕەقیبی سەگ دەڵێ بیدەرە دەستی قەت مەڵێ | | زەحمەتە ڕووحی دەرپەڕێ زگی دەچێت و گوو دەکا |
| نالیی و زولفی دلبەری کوردیی و گەردی عەنبەری | | حاجیی و کاکۆڵی سەری (کۆشکی)ی و مەیلی ڕوو دەکا |
- مێژووی ئەدەبی کوردی، بەرگی چوارەم، مارف خەزنەدار، لاپەڕە ٥٩١، دەزگای چاپ و بڵاوکردنەوەی ئاراس، ھەولێر – ٢٠٠٤.
