نەتەوەی ئاگر

نەتەوەی ئاگر نەتەوەیەکە لە جیھانی خەیاڵیی زنجیرە ئەنیمەیشنی ئەڤەتار: دوایین ملکەچپێکەری ھەوا. شانشینی نەتەوەی ئاگر دەکەوێتە ڕۆژاوای جیھانی ئەڤەتار. نەتەوەی ئاگر دەسەڵاتێکی پاشایەتی تەواو بۆماوەیی ھەیە. پاشا بە پەروەردگاری ئاگر دەناسرێت. لە ماوەی شەڕی ١٠٠ ساڵەدا، پاشاکانی ئاگر جگە لە خاکی سەرەکیی خۆیان، چەندین شاریان لە شانشینی زەوی کۆنترۆڵ کرد و بە داگیرکاریخواز ناسراون.

پێکبەستن

نەتەوەی ئاگر بەناوبانگە بە چاونەترسی و بەھێزترین نەتەوە لە نێو ھەموو نەتەوەکانی دیکەدا، خەڵکانی نەتەوەی ئاگر تێکەڵاوی و بارودۆخی کۆمەڵایەتیان نیە یان کەمە لەگەڵ گەلانی دیکەدا. خەڵکی ئەم وڵاتە شانازی بە داھێنەری و سەربەخۆیی و ھێزی خۆیانەوە دەکەن، کە زیاتر نزیکە لە ناسیۆنالیزم.

شوێنەکان

پایتەختی نەتەوەی ئاگر

پایتەختی نەتەوەی ئاگر کە بە شاری پایتەخت یان شاری داگیرکاری ناسراوە، ناوەندی بەڕێوەبردنیی حکوومەت و سیاسەت و کلتوورییە بۆ ملکەچپێکەرانی ئاگر. شوێنی نیشتەجێبوونی پەروەردگاری ئاگر و خێزانی شاھانەی نەتەوەی ئاگر و باڵادەستەکانی نەتەوەی ئاگرە. شارەکە دەکەوێتە دوورگەی پایتەخت کە دوورگەیەکی گەورەیە لە ناوچەی ڕۆژاوای نەتەوەی ئاگر. بەھۆی بەرگرییە بەرفراوانەکانییەوە، پایتەختی نەتەوەی ئاگر وەک یەکێک لە شارە قەڵادارەکانی جیھان دادەنرێت، شانبەشانی با سینگ سێ. ئەم ئاستە لە پاراستنە لەگەڵ لێھاتوویی ھێزی دەریایی نەتەوەی ئاگر ڕێگری لە پایتەختەکە کرد کە ببێتە گۆڕەپانی شەڕی گەورە لە کاتی جەنگی سەد ساڵەدا. سەرەڕای ئەمەش، لە کاتی لەشکرکێشییە شکستخواردوەکەی سەر نەتەوەی ئاگر لە ڕۆژی خۆرگیراندا لەلایەن تیمی ئەڤەتار و ھاوپەیمانانی، کەوتە بەر ھێرشێکی گەورە.

شاری نافورەی ئاگر

لە سەرەتادا ناوی باکووری چونگ-لینگ بووە، شارێکی گەورەی پیشەسازییە و دەکەوێتە دوورگەی شوھۆن. بەھۆی پەیکەری گەورەی پەروەردگاری ئاگر، پاشا ئۆزای، لە ناوەندەکەیدا ناوی لێنراوە.

دوورگەی ڕۆکو

دوورگەیەکی بچووکی نەتەوەی ئاگرە کە ماڵی ئەڤەتار ڕۆکو بوو. پێش تەقینەوەی گڕکانێکی کارەساتبار، دوورگەکە جێگای نیشتەجێبوونی بچووک بچووک بووە. دوورگەکە لەلایەن ئەڤەتار ئانگەوە لە وەرزی یەکەمی زنجیرەی ئەڤەتار: دوایین ملکەچپێکەری ھەوا سەردانی کراوە، بە مەبەستی فێربوون لە ئەڤەتار ڕۆکوەوە.

دوورگەی ئەمبەر

ناوچە و دوورگەیەکی بەناوبانگی ھاوینەھەوارییە و دەکەوێتە دوورگەکانی دەرەوەی باکووری نەتەوەی ئاگر. لە نێوان دارخورما و ڕووەکی چڕ و پڕدا ھەڵکەوتووە، شوێنی چەندین ھاوینەھەواری ڕابواردنە و ماڵی پشووە بۆ دەوڵەمەند و دەسەڵاتدارەکان. زۆرێک لە بەرپرسە باڵاکانی نەتەوەی ئاگر لێرە ماڵی پشوویان ھەیە و دوورگەکە وەک شوێنی پشوودانی سەرەکی لە نەتەوەی ئاگر دادەنرێت. کەناراوەکانی بە خۆڵی ڕەشی تایبەتی و بە شاخ و تەپۆڵکە دەورە دراوە، کە کەشێکی تایبەت بۆ سەردانکەران دروست دەکات. کەناراوەکان لە بەناوبانگترین کەناراوەکانن لە شانشینەکەدا و میوانداری چەندین یاری و پاڵەوانییەتی بەناوبانگی تۆپ دەکەن.

سەرچاوەکان

بەشداربووانی ویکیپیدیا، «Od Milləti»، ویکیپیدیای ئازەری. سەردان لە ٢١ی حوزەیرانی ٢٠٢٤.