محەممەد سەعید نەججاڕی
محەممەد سەعید نەججاڕی ناسراو بە ئاسۆ (لەدایکبووی ١٩٥٦ لە سارۆقامیش، بۆکان) نووسەر و شاعیرێکی کوردە.
محەممەد سەعید نەججاڕی | |
|---|---|
| لەدایکبوون | ١٩٥٦ |
| نەتەوە | کورد |
| ناوەکانی تر | ئاسۆ |
| پیشە | شاعیر، نووسەر |
ژیان
دەستکاریئاسۆ بەپێی ناسنامە ڕۆژی ٩ی جۆزەردانی ساڵی ١٩٥٦ لە ئاوایی سارۆقامیشی ناوچەی فەیزوڵڵابەگی سەر بە شاری بۆکانی ڕۆژھەڵاتی کوردستان لە دایک بووە. ھەر لەوێ کە بۆ یەکەم جار بە حەولی برایم خان خوێندنگە کراوەتەوە، نراوەتە بەر خوێندن. لە شارەکانی سەقز و بۆکان درێژەی بە خوێندن داوە. ساڵی ١٣٨٠ لە زانکۆی تەورێز ماستەری (ئەدەبیات و وێژەی فارسی) وەرگرتووە. ساڵی ١٩٩٣ لە یەکەم ھەڵبژاردنی ئەنجومەنی ئەدەبیی بۆکاندا وەک یەکێک لە حەوت بەڕێوەبەری ئەو ڕێکخراوەیە ھەڵبژێردراوە. لە قوتابخانە و زانکۆکانی شاری بۆکان مامۆستای ئەدەبیاتی فارسی بووە و پاشان خانەنشین کراوە؛ دواتر بۆ وانە گوتنەوەی فارسی لە کۆلێژی پەرەستاریی شاری بۆکان بانگھێشت کراوەتەوە.[١]
ناوەرۆکی ھۆنراوە
دەستکاریئاسۆ سەر بە بەرەی شاعیرانی پاش ھێمن و ھەژار و ھێدی و ئاواتە. ھونراوەکانی ئاسۆ زۆربەیان شیعری کلاسیک و لەسەر شێوازی غەزەلن. غەزەلەکانی تەژین لە باس و خواسی دڵداری و خۆشەویستی و لەسەر زاران نەرم و ڕەوانن. ھەروەھا باسی خاک و نیشتمانپەروەریشی ھاوپێچی غەزەلە عاشقانەکانی کردووە. ئاسۆ شیعری نوێشی نووسیوە، بەڵام بەھۆی غەزەلەکانییەوە ناسراوە.
بەرھەم
دەستکاریبەرھەمە چاپ کراوەکانی بریتین لە:
- دیوانی تەوژمی خەیاڵ (شیعرەکانی تا ١٣٧٠ی ھەتاوی)
- دیوانی گەزیزە[٢](شیعرەکانی ١٣٧٠ تا ١٣٧٣ی ھەتاوی)
- دیوانی پەیکی شادی (شیعرەکانی ١٣٧٣ تا ١٣٨٦ی ھەتاوی)
- دیوانی جومعەکان[٣] (شیعرەکانی ١٣٨٦ تا ١٣٩٢ی ھەتاوی)
- ڕۆمانی ڕێبوار
- شەرح و لێکدانەوەی شیعرەکانی میسباحودیوان "ئەدەب"[٤]
- شەرح و لێکدانەوەی شیعرەکانی میرزا عەبدولڕەحیمی سابڵاغی "وەفایی"[٥]
- وەرگێڕانی بەشێک لە شیعرەکانی دیوانی "ناڵەی جودایی"ی ھێمن بۆ زمانی فارسی
نموونەی شیعری
دەستکاریبازنشەست
| لەو ھەموو یارانە، ئێستا تاقە یەکیان دیار نییە | دۆست و یاری ئەم زەمانەش تاقە یەکیان یار نییە | |
| کوانێ ئەو یارەی کە ئاوێزانی بووم ترسام شەوێ | پێی کوتم: لە منت کەوێ! پەلکەن! مەترسێ مار نییە | |
| عاشقیش زۆرن بەڵام عەشق و ئەوین بۆتە ھەوەس | دڵ ھەمووی بەسوێن کەچی ھیچ دڵبەرێ دڵدار نییە | |
| ھەر دەڵێی دونیا ھەوارێ کۆنە جێی بێری چەلەنگ | ڕانەمەڕ خەوتوون و لوورەی گورگە، شوان ھەر دیار نییە | |
| ھێندە گریاوم مژۆڵم وا تەڕ و جووت جووت بووە | پێی لەسەر دانێ مەترسێ چاوەکەم، بزمار نییە | |
| پێت لەسەر چاوم ئەگەر دووبارە ئاشتت بێتەوە | ماڵی دڵ ئی خۆتە قوربان، جێگە پێی ئەغیار نییە | |
| بارەگای عیشقە بە پیریش، عەیب نییە و بۆ چوون دەبێ | گەرچی ماڵی دڵ وەھاش ڕووخاوە، جێی بۆ بار نییە | |
| شیعری من ئاوێنەیە خۆی تیا دەبینی دەم بە دەم | گەرچی خودبینی خراپە، بۆ ئەویندار عار نییە | |
| گەر کرێکارت دەوێ بۆ دەرکەوانی ماڵەکەت | بازنشەستە ئێستە «ئاسۆ» کەس وەک ئەو بێکار نییە[٦] |
کانی شێتە ١٣٨٧
سەرچاوەکان
دەستکاری- ^ «وتووێژی تایبەتی ھاژە لەگەڵ شاعیر و نووسەری کورد مامۆستا ئاسۆ». ھاژە. لە ١٢ی نیسانی ٢٠٢١ ھێنراوە.
{{cite web}}: ڕاگرتنی شێوازی سەرچاوەی ١: ڕەوشی ناونیشان (بەستەر) - ^ نەججاڕی، محەممەد سەعید، گەزیزە، بڵاوکەرەوە نووسەر، ١٩٩٣
- ^ نەججاڕی، محەممەد سەعید، جومعەکان، انتشارات آرمان نگار، تاران ١٣٩٤
- ^ نەججاڕی، محەممەد سەعید (شەرح و لێکدانەوە)، دیوانی مصباح الدیوان ئەدەب، انتشارات صلاح الدین ایوبی، ورمێ ١٣٨١
- ^ نەججاڕی، محەممەد سەعید (شەرح و لێکدانەوە)، دیوانی وەفایی، بڵاوکردنەوەی کوردستان، چاپی دووھەم، سنە ١٣٩٣
- ^ نەججاڕی، محەممەد سەعید، جومعەکان، لاپەڕەی ١٤١ و ١٤٢، انتشارات آرمان نگار، تاران ١٣٩٤
 | ئەم ژیاننامە وتارە کۆلکەیەکە. دەتوانیت بە فراوانکردنی یارمەتیی ویکیپیدیا بدەیت. |