محەمەد مستەفا (حەمەبۆر)

محەمەد مستەفا (حەمەبۆر):(١٩٢٠) نووسەر ، شاعیر ، وەرگێڕ ، پێشكەشكار ، لەنەتەوەی كورد بووە.

محەمەد مستەفا (حەمەبۆر)

سەرەتای ژیان و خوێندنی

محەمەد مستەفا (حەمەبۆر) ١٩٢٠ لە سلێمانی لەدایک بووە.یەکەم جار خوێندنی لە حوجرە دەست پێ کردووە، دواتر قۆناغەکانی سەرەتایی و ناوەندی و ئامادەییی لە سلێمانی و ھەولێر و بەغدا تەواوکردووە. ١٩٤٠ بووە بە برینپێچ (مضمد) لە سلێمانی. ١٩٤٧ چووەتە بەغدا و لەوێ بووە بە برینپێچی بەیتاڵخانە و موعاوینی بەیتاڵی.

ڕادیۆی کوردیی بەغدا

١٩٦٠-١٩٦٧ لەتەک کارەکەی خۆی، لە ڕادیۆی کوردیی بەغدا کاری کردووە و چەند بەرنامەیەکی پێشکەش کردووە. لەو مێژووە بەدواوە بە وەرگێڕ و پێشکەشکەر لە ڕادیۆی بەغدا دامەزراوە. پاشان لە ئاژانسی دەنگوباسی عیراقیدا کاری کردووە تا ١٩٨٢، کە بە داوای خۆی خانەنشین بووە. ١٩٩٨ ماڵەکەیی لە بەغداوە ھێناوەتەوە بۆ سلێمانی، ماوەیەک لە ئەرشیڤی ڕۆژنامەکانی "کوردستانی نوێ" و "الاتحاد"دا کاری کردووە.

بەرهەمەكانی

حەمەبۆر، زمانەکانی عەرەبی و فارسی و تورکیشی زانیون. شارەزای مشت و ماڵدانی دەستنووسی کۆن و دەستی شیعریشی ھەبووە، ناسناوی "ھۆشەنگ" بووە. نووسینی لە (گەلاوێژ، ھەتاو، بەیان، ڕەنگین، ھاوکاری) بڵاوکردووەتەوە. سەروبەندی دەرچوونی "ھەتاو"یش، بریکاری فرۆشی گۆڤارەکە بووە.

بەرھەمەکانی:

• ھەمیشەبەھار، چاپخانەی نەجاح و ژین، ١٩٤١،
• کەڵدانی دەستکردی (التلقيح الاصطناعي)،
• ساغکردنەوە و لەسەرنووسین و لێ زۆرکردنی شیعری دیوانی شێخ ڕەزای تاڵەبانی،
• چەوەندەری شەکر،
• دیوانی مستەفا بەگی کوردی، دوو بەرگ، دەزگای ئاراس- ھەولێر، ٢٠١٣،
• دیوانی مەلا حەمدوون.

نزیکەی پەنجا دەستنووسی ھەمەجۆری لە پاش بەجێماوە، لەوانە:

• ساڵنامە
• دەرمان لە کوردەواریدا
• حسەینییە: دانراوی عەبدوللەتیفی مەردۆخی کە فەرھەنگی عەرەبی- کوردییە بە شیعر،
• دیوانی شێخ ڕەزای تاڵەبانی
• لێکۆڵینەوە لە شەرەفنامە
• بەرنامەکانی ئیزگەی ڕادیۆی بەغدا
• نەخۆشییەکانی ئاژەڵ (بە کوردی و عەرەبی)
• بەرنامەی ھەمەچەشنە
• دیوانی شیعرەکانی خۆی
• فەرھەنگی پەھلەوی- کورد و فارسی
• فەرھەنگی مازیندەران بۆ کوردی و فارسی
• بیرەوەرییەکانی
• ژن لە ژیانمدا
• حەمەبۆریان کوشت
• شێخ مەحموودی حەفید
• زێوەر