ھونەرگەی وڵات

ھونەرگەی وڵات (بە کورمانجی: Hunergeha Welat) ناوەندێکی چاند و کەلتووری شۆڕشگێرە کە لە باکوور و ڕۆژھەڵاتی سووریا و ڕۆژاوای کوردستان چالاکی دەکات.

مێژوو

وڵات یەکێک لە ئەندامەکانی بزووتنەوەی چاند و ھونەر لە شۆڕشی ڕۆژاوا بوو کە لە کۆتاییەکانی ساڵی ٢٠١٣ بە دەستی بەرەی نوسرە کوژرا. وڵات بەر لە کوژرانی دەیھەویست ناوەندێک بۆ چاند و کەلتووری شۆڕشگێری گەل دابمەزرێت. بۆیە بەدوای گوژرانی بۆ ڕێزگرتن لە بیری ئەو ناوەندی چاند و ھونەر بە ناوی ئەو ناو نرا. ھونەرگەی وڵات لە ٢٤ی تەممووزی ٢٠١٤ دامەزرا.

ئامانج

ھونەرگەی وڵات بە ئامانجی زیندووکردنەوە کارەکانی ھونەرمەندانی ناسراوی ڕابردوو کە ڕۆڵی ھەرە گرینگێکیان لە پاراستنی مۆسیقای کوردی ھەبووە و ھەروەھا بەڵگەدارکردنی مێژووی ھونەر و چاندی کوردی و زیندووکردنەوەی گۆرانییەکانی کۆنی شۆڕشگێر و فۆلکلۆر دامەزراوە. لە ڕۆژاوای کوردستان لە دەھەی ١٩٨٠ ھونەری شۆڕشگێر بە تایبەت لە بواری مۆسیقا بەرھەم ھێنراوە و سەدان گۆرانیی شۆڕشگێڕانە خوێندراوەتەوە و ڕۆژاوای کوردستان سەرەڕای بچۆکبوونی ئەو پارچە لە خاکی کوردستانە لە ھونەری شۆڕشگێر لە زۆرێک لە ناوچەکانی دیکە سەرتر و پێشترە؛ بۆیە پاراستنی ئەم سوننەتە ئەکێک لە ئەرکەکانی ھونەرگەی وڵاتە. ھونەرگەی وڵات ھەروەھا مۆسیقای شۆڕشگێڕانەی تازە بە دەنگی ھونەرمەندانی ڕۆژاوای کوردستان بەپێی بارودۆخی خەڵک و کۆمەڵگای ناوچەکە بەرھەم دەھێنێت.

ھونەرگەی وڵات لەسەر پارادایمی نەتەوەی دیموکراتیک و بیرۆکەی عەبدوڵڵا ئۆجەلان چالاکی دەکات و لە فێرکردنەوەی ھونەریش لەسەر ھونەری دیموکراتیک و شۆڕشگێرانە سوڕە. ھەروەھا لە پەروەردەکردنی کەسایەتییەکانی ھونەری ھەوڵ دەدرێت تا کاری پەوەردە لەسەر بنەمای ھونەری ڕاستەقینە و ڕەسەنی نەتەوەی دیموکراتیک ئەنجام بدرێت. بۆیە ھەموو بەرھەمەکانی ھونەرگەی وڵات بە ھۆی ڕەچاوکردنی ئەم بیرۆکەیە لە باری ناوەڕۆک، بڵاوکردنەوە، شێواز و ئامانج جیاوازیی لەگەڵ کارەکانی دیکە ھەیە.

چالاکییەکان

ھونەرگەی وڵات ھەروەھا لە بواری پەروەردەی ھونەر چالاکی دەکات و دەورەکانی فێربوونی مۆسیقا بە تایبەت بۆ منداڵەکان پێشکەش دەکات.

ھونەرگەی وڵات ھەتا کانوونی دووەمی ٢٠٢٣، زۆرتر لە ٢٧٥ گۆرانیی تۆمار کردووە و بۆ ٤٩یان ڤیدیۆکلیپ چێ کردووە.

کارەکان

ڤیدیۆکلیپەکان

• شەرڤانۆ
• ھەی زاپێ، ٢٠١٩
• ڕەوانێ ڕەسەن، ٢٠٢٠
• شێلادزێ
• فەلاکەتم
• سەرھەڵدان
• خورفانی
• سەرێکانیێ و ئاڤاشین
• لەیلا گووڤەن
• نازێ نێرگزا ھەوشێ
• نەوڕۆزە

بەشەکانی ھونەرگە

ھەنورگەی وڵات خاوەنی بەشەکانی تۆمارکردن، تەکنۆلۆجیا (دیمەن و مۆنتاژ)، بەشی دەنگ و بەشی تایبەت بە منداڵانە.

بەشی منداڵان

بەشی منداڵانی ھونەرگەی وڵات لە ساڵی ٢٠٢٣دا خەریکی دامەزرانە.

ئەندامەکان

• دەلیل میرساز
• سەرخوەبوون زینۆ
• جۆمێرد ھەسەن
• مەحموود بەرازی

ئەمانەش ببینە

• ناوەندی چاند و ھونەری بێستوون