پاردێز

پاردێز یا بەھەشت شوێنێکی ئیدێالە. لە دیمەنی ئایینییەوە مرۆڤە پاکەکان لە جیھانی دیکەدا پاردێز دەبێتە بەشیان، لە رەوشێکدا کە مرۆڤە بەدکارەکان دەچنە دۆژە.

پاردێز بەرھەمی یەن برۆیگل.

وشەرەتناسی (ئێتیمۆلۆژی)

وشەی پاردێز لە بنەرەتدا لە ئاوێستایی پەیری-دەێزە (-pairi.daêza) گیراوە کە لە دوو بەشی پەیری- ~ «گرتووپەڕ، پەرا» و دیز- ~ «دروستکردن، سازکردن» پیکھاتووە. ئەم وشە لە زمانە کۆنە ئێرانییەکانەوە چووەتە ناو زۆربەی زمانانی گرنگی جیھانەوە: یۆنانی پارادێیسۆس (παράδεισος)، ئارامی پارادیسە (pardaysa) (پاردێزگای کەیانی)، ئەکەدی پاردێسو (pardesu)، ئیلامی پارتێتاس (partetas) (شوێنەوار، ناوکۆ، گۆڕەپان)، عیبری پاردێس (pardes) (باخ و بۆستان) و عەرەبی فیردەوس (firdaws). ئەم وشەیە لە زمانەکانی نوێی ئێرانیدا تەنیا لە کوردی (پاردێز، پەردێز) و فارسیی نوێ (پالیز) پاشماوە.