ئیسماعیل خەیات
ئیسماعیل خەیات (١٩٤٤ لە خانەقین - ٢٠ی تشرینی یەکەمی ٢٠٢٢ لە سلێمانی) ھونەرمەندی شێوەکاری کوردی خەڵکی باشووری کوردستان بوو. ئیسماعیل خەیات وەکوو ھونەرمەندێکی کوردی ناسراو لە پیشخستنی ھونەری شێوەکاری بە تایبەت لە شاری سلێمانی ڕۆلێکی گرنگی ھەبووە و ھەروەھا لەسەر ئاستی عێراق لە مێژووی ھونەری شێوەکاریی ساڵەکانی شەستەکان، حەفتاکان و ھەشتاکاندا بەشداری کردووە.[١] ئەو ئەندامی کۆمەڵەی شێوەکارانی جیھان بوو.[٢]
ئیسماعیل خەیات | |
|---|---|
| لەدایکبوون | ١٩٤٤ |
| مەرگ | ٢٠ی تشرینی یەکەمی ٢٠٢٢ |
| خوێندنگە | خانەی مامۆستایانی بەعقووبە |
| پیشە | شێوەکار |
| چالاکبوون | ١٩٦٣–٢٠٢٠ |
| ھاوسەر | گەزیزە عومەر |
ژیان
دەستکاریئیسماعیل خەیات لە ساڵی ١٩٤٤ لە شاری خانەقین لە دایک ببوو. ئەو دەرچووی خانەی مامۆستایانی بەعقووبە بوو. ھەروەھا لە نێوان ساڵانی ١٩٩٢ ھەتا ١٩٩٨ لە وەزارەتی ڕۆشنبیریی حکوومەتی ھەرێمی کوردستان، بەڕێوەبەری ھونەری شێوەکاری بوو.[٢] ھەروەھا لە ساڵی ١٩٦٧دا وەکوو سەرپەرشتیاری ھونەری لە چالاکی قوتابخانەکانی سلێمانی بەشدار بووە.[١]
ئیسماعیل خەیات لە ڕێکەوتی ١٠ی شوباتی ٢٠٢٠ بەھۆی ڕووداوێکی کەوتندا لە ماڵەکەی خۆی تووشی نەخۆشی بوو و بەدوای دوو کەڕەت نەشتەرگەریی قورس بۆ مێشکی بۆ ماوەی نزیکەی دوو ساڵ بێھۆش کەوت.[١] ئەو لە ئاکامدا لە کاتژمێری ١١:٣٠ی پێشنێوەڕۆژی پێنجشەممە ٢٠ی تشرینی یەکەمی ٢٠٢٢ کۆچی دواییکرد.[٢]
چالاکییەکان
دەستکاریئیسماعیل خەیات، لە ماوەی ٥٧ ساڵ ژیانی ھونەریی خۆیدا ٤٥ پێشانگەی شێوەکاریی کردووەتەوە.[٢]
لە کاتی شەڕی براکوژی و دابەشکردنی باشووری کوردستان لەنێوان دوو لایەنی پارتی و یەکێتی، ئیسماعیل خەیات وەکوو ناڕەزایەتییەک دژی ئەو شەڕە و بۆ پاڵپشتیکردن لە ئاشتەوایی و یەکبوونەوەی کوردستان، بەردەکانی سنووری نێوان پارتی و یەکێتیی لە دێگەڵەی ڕەنگ کرد.[٢]
پێشنیاری درۆستکردنی ناوەندێکی ھونەری ئیسماعیل خەیات
دەستکاریلە دوای تێکچوونی باری تەندروستیی ئیسماعیل خەیات لە ڕێکەوتی ٢٩ی ئایاری ٢٠٢٠دا، زامۆئا داراغا پێشنیاری کرد ناوەندێکی ھونەری وەک شوینێک بۆ ئەرشیف و لیکۆلینەو و شیکاری لەسەر ھونەری شێوەکاری کوردی بە ناوی ئیسماعیل خەیاتەوە درۆست بکرێت. بەلام تا کاتی کۆچی دوایی ئەو ھونەرمەندە ھیچ دامودەزگایەکی حکوومی و ناحکوومی بەدەم ئەم پێشنیارەوە نەھاتووەتەوە.[١]