یەدوڵڵا ڕەحمانی

یەدوڵڵا ڕەحمانی (١٩٥٠ لە بێڵەھوو لە نزیکی سەرپێڵی زەھاو - ٢٨ی حوزەیرانی ٢٠١١ لە کرماشان)، ھونەرمەندی شاعێر و گۆرانیچڕ و مامۆستای مەقامبێژی ناوچەی گەرمیان (سەرپێڵ زھاو، قەسر، گیەڵان، ئەیوان، خانەقین) لە ڕۆژئاوای پارێزگای کرماشان بوو.

یەدوڵڵا ڕەحمانی
زانیارییەکان
لەدایکبووی	١٩٥٠ بێڵەھوو، سەرپێڵ زھاو، پارێزگای کرماشان، ڕۆژھەڵاتی کوردستان
مردووی	٢٨ی حوزەیرانی ٢٠١١ کرماشان، ڕۆژھەڵاتی کوردستان
پیشە(کان)	گۆرانیبێژ، مامۆستا، شاعیر
ساڵانی چالاکبوون	١٩٧٠ تا ٢٠١٠

ژیان

یەدوڵڵا ڕەحمانی لە ساڵی ١٩٥٠ی زایینی لە گوندی بێڵەھوو سەربە ناوچەی گۆران لە پارێزگای کرماشانی ڕۆژھەڵاتی کوردستان لە دایک ببوو. بۆ خوێندنی سەرەتایی چوو بۆ سەرپێڵی زەھاو و خوێندنی ناوەندیی خۆی لە شارەکانی تاران و قەسرشیرین بەردەوام کرد. لە ساڵی ١٩٧٠ چوو بۆ کۆلێژی ئادابی کرماشان و لە ساڵی ١٩٧٣ وەکۆ مامۆستای زمانی فارسی دەستی کرد بە کار. لە ساڵ ١٩٧٠ لەگەڵ گرووپی ئۆرکسترای ڕادیۆی کرماشان ئاشنا بوو و ھاوکاریی لەگەڵ ئەو گرووپە کرد و یەکمین گۆرانیی خۆی بە ناوی ھیجران بۆ ڕادیۆ کرماشان خوێندووە.

یەدوڵڵا ڕەحمانی لە ڕێکەوتی ٢٨ی مانگی حەزەیرانی ساڵی ٢٠١١ لە کرماشان کۆچی دوایی کرد و لە گۆڕستانی میناوا لە شاری کرماشان بە تەنیشتی گۆڕی مامۆستای ئاواز حیشمەتوڵڵا لوڕنەژاد بە خاک سپێردرا.

مەقامەکانی کوردی

یەدوڵڵا ڕەحمانی لە مەقامخوێنی کوردی مامۆستایەکی پایەبەرز بوو و مەقامەکانی بەوێنەی ئای ئای، قەتار، ئەڵڵاوەیسی، چەمەری، پایەمووری، ئاغامیڕەو، بانگ ھەڵدان، کۆتەڵ و ھەروەھا لە ئاوازی کوردیی ھوورە کە تەیبەت بە ناوچەی باشووری ڕۆژھەڵاتی کوردستان و خەڵکی کەڵھور، گۆران، سنجاوی و دیتر مەردمانی ئەو ناوچەیە، لە ڕەحمانی بە یادگار ماوەتەوە.

بەرھەمەکان

ئەلبۆمەکان

• ئەڵوەناتی: ئەم ئەلبۆمە بە ھاوکاری ھونەرمەندی کەمانچە ژەن و ئاوازدانەری کورد شەھریار جەمشیدی و بە ھاوبەشیی تیپی دیلان لە سالی ٢٠٠٤ دا بە فۆرمەتی کاسێت ئامادە کراوە.
• یادی جاران

ژێدەر

• گۆڤاری کەلەپووری کورد، دیداربینییەکی تایبەتی لەگەڵ ھونەرمەند یەدوڵڵا ڕەحمانی، سازدان و ئامادەکردنی: عەبدوڵڵا حەسەن قادر)، ژمارەی ٢٢ی ساڵی ٢٠١١، ل٥١–٦٧.