ڕووناکی (بە ئینگلیزی: Light) یا ڕووناکیی بینراو (بە ئینگلیزی: visible light) ئەو بەشەی شەبەنگی کارۆموگناتیسییە کە بە چاوی مرۆڤ هەستی پێ دەکرێت. لە ڕاستیدا ئەگەر درێژی شەپۆلی کارۆموگناتیسی لەنێوان ٤٠٠–٧٠٠ نانۆمەتر بێت چاوی مرۆڤ هەستی پێ دەکات، کە بەو مەودایە دەگوترێت ڕووناکی یا ڕووناکی بینراو. خێرایی ڕووناکی لە بۆشایییدا ٢٩٩،٧٩٢،٤٥٨(مەتر/چرکە)، یەکێکە لە نەگۆڕە بنەڕەتییەکانی سروشت. لە فیزیادا، وشەی 'ڕووناکی' هەندێک جار ئاماژە بە هەموو شەبەنگی کارۆموگناتیسی دەکات، چ بینراو بێت یان نا. بەم واتایە، تیشکی گاما، تیشکی X، مایکرۆیی و شەپۆلی ڕادیۆییش ڕووناکین. هەروەک هەموو جۆرەکانی تری شەپۆلی کارۆموگناتیسی، ڕووناکی جۆرێکە لە وزە کە بە شێوەی شەپۆل دەگوێزرێتەوە. بەڵام ڕووناکی جیاوازە لە جۆرەکانی تری شەپۆل، وەکو شەپۆلەکانی دەنگ و شەپۆلەکانی ئاو، ناگوێزرێنەوە ھەتاوەکو بە ناوەندێکدا تیپەڕ نەبن کە ئەمانەش پێیان دەوترێت شەپۆلە میکانیکییەکان، بەڵام ڕووناکی پێویستی بە ناوەند نییە بۆ ئەوەی تێیدا بگوێزرێتەوە.