کۆلێژی پزیشکیی گەرمیان

کۆلێژی پزیشکیی گەرمیان یەکێکە لە فاکەڵتییەکانی زانکۆی گەرمیان کە لە شاری کەلار، ئیدارەی گەرمیان، ھەرێمی کوردستان ھەڵکەوتووە. کۆلێژەکە لە ساڵی ٢٠١٨دا دامەزراوە.

کۆلێژی پزیشکیی گەرمیان

جۆر	فاکەڵتیی حکوومی
دامەزراندن	٢٠١٨
پەیوەستی ئەکادیمی	وەزارەتی خوێندنی باڵا و توێژینەوەی زانستی
سەرۆک	شێرکۆ نەریمان سوبحان
شوێن	کەلار ، ئیدارەی گەرمیان ، ھەرێمی کوردستان
زمان	کوردی
وێبگە	medicine.garmian.edu.krd

مێژوو

کۆلێژی پزیشکیی گەرمیان لە ساڵی ٢٠١٨دا وەک فاکەڵتییەک لە زانکۆی گەرمیان دامەزرا. بنکەی کۆلێژەکە لەناو بینای تاقیگەکانی زانکۆی گەرمیاندا ھەڵکەوتووە، پاش ئەوەی لە ساڵی ٢٠٢١دا لە بینای زانستەوە گوازرایەوە بۆ بینای تاقیگەکان و ھەتا ئێستاش لەوێدا ماوەتەوە. لە ماوەی ساڵی ٢٠٢٤دا سێ بەش لە کۆلێژەکەدا دامەزراون کە بریتین لە زانستە بنەڕەتییەکان، زانستە کلینیکییەکان و فێرکردنی پزیشکی. کۆلێژەکە دوو تاقیگەی ھەیە کە بریتین لە تاقیگەی ئەناتۆمی و تاقیگەی پزیشکی. ھەروەھا یەکەمین خوولی خوێندکاران لە ساڵی ٢٠٢٣–٢٠٢٤دا دەرچوون.

بارودۆخ

ئەم کۆلێژە لەلایەن حکوومەتی عێراقەوە دانپێنراو نییە، بەڵام لەلایەن حکوومەتی ھەرێمی کوردستانەوە دانپێنراوە. شایانی باسە کولێژەکە کێشەی نەبوونی تاقیگە و نەخۆشخانەی فێرکاریی ھەیە، ئەمەش بەھۆی کێشە دارایییەکانی حکوومەتی ھەرێم لە دەیەی ٢٠٢٠دا. بەھۆی کێشەکانی ئەم کۆلێژە و کەمبوونی پێداویستییەکان لە ساڵی ٢٠٢٣دا، خوێندکاران خوازیاری داخستنی کۆلێژەکە بوون و داوای گواستنەوەی خۆیان بۆ زانکۆکانی دیکە کرد.

بەستەرە دەرەکییەکان

• وێبگەی فەرمی