ئۆکتاڤیۆ پاس

ئەكتافیۆ باس

ئەكتافیۆ باس ، شاعیر و ئەدیب و سیاسەتمەدارێكی مەكسیكی بووە ، لە 31 مارسی ساڵی 1914 لەشاری مەكسیك لەدایك بووە ، ساڵی 1990 خەڵاتی نۆبڵی لەئاداب وەرگرتووە و یەكەم شاعیر و ئەدیبی مەكسیكی بووە كە ئەم خەڵاتە وەربگرێت ، دژ بەفاشیسزم وەستاوە و لەچەند وڵاتێك وەكو دیبلۆماتكار كاری كردووە و لەچەند بوارێكی جیا جیا چالاكی هەبووە ، سەرەڕای ئەوەی شاعیر بووە ژمارەیەكی زۆر نووسینی هەبووە لەبواری ڕەخنەگرتن و مێژوو هەروەها ووتاری سیاسیشی نووسیوە. ئەكتافیۆ باس باوكی مەكسیكی بووە دایكیشی خەڵكی باشووری ئیسپانیا بووە ، باوكی پارێزەر و سیاسەتمدار بووە و لە ڕوداوی هاتوچۆی شەمەندەفەر گیانی لەدەستداوە ، دایكیشی هەرچەندە نەخوێنەوار بووە هەر لەمنداڵیەوە هانی داوە بخوێنێ‌ و شیعر بنوسێ‌ . ئەكتافیۆ باس كەتەمەنی گەشتۆتە 17 ساڵان بۆ یەكەم جار یەكێك لەشیعرەكانی بڵاوكردۆتەوە ، ساڵی 1945 بۆتە دیبلۆماتكار و بۆ ماوەی 23 ساڵ لەو بوارەدا كاری كردووە و لەهەر یەكە لە وڵاتەكانی فەرەنسا و سویسرا و هیندستان و یابان وەكو باڵیۆزی وڵاتەكەی دامەزراوە و كاری كردووە ، ساڵی 1968 دوای ئەوەی دەسەڵاتدارانی مەكسیك توندوتیژیان بەرامبەر بە قوتابیان بەكارهێنا و خۆپیشاندانی قوتابیانیان سەركوتكرد و نزیكەی 300 قوتابیان كوشت ، دەستی لەكاری دیبلوماتكاری كێشایەوە و كاتەكانی خۆی بۆ ڕۆژنامەنووسی تەرخان كردووە. باس لەبوارەكانی شیعر و هونەر و ئایین و مێژوو و سیاسەت و ڕەخنەگرتنی ئەدەبی چالاك بووە و 5 دیوانی شیعری بڵاوكردۆتەوە یەكەمیان لەساڵی 1949 بووە و دوا دیوانی شیعریشی لەساڵی 1987 بووە ، ساڵی 1981 خەڵاتی سیربانتسی وەرگرتووە كە گەورەترین خەڵاتی ئەدەبیە و دەبەخشرێت بەكەڵە نوسەرە ئیسپانیەكان ، ساڵی 1987 لەلایەن ویلایەتەیەكگرتوەكانی ئەمریكاوە خەڵاتكراوە ، زیاتر لەجارێكیش پاڵاوتراوە بۆ خەڵاتی نۆبڵ دواجار لەساڵی 1990 بەدەستی هێناوە و لە 19 ئەبریلی ساڵی 1998 لەتەمەنی 84 ساڵیدا كۆچی دوایی كردووە.

وەرگێڕانی لە ویكیپیدیای عەرەبیەوە ( محمد فاتح )