بەرەی تێکۆشانی دیموکراسی
بەرەی تێکۆشانی دیموکراسی (بە عەرەبی: جبھة النضال الديمقراطي) کە پێشتر لەژێر ناوی بەرەی دیموکراسی گەل (بە عەرەبی: الجبھة الديمقراطية الشعبية) چالاک بوو، ڕێکخراوەیەکی سیاسییە کە لە چالاکوانان و سیاسەتوانانی ھەموو پێکھاتەکانی عێراق پێک ھاتووە و لە ئاستی وڵاتی عێراق چالاکی دەکات. دروشمی بەرەی تێکۆشانی دیموکراسی دادپەروەری، ئاشتی، ئازادی و پێکەوە ژیانی گەلانی عێراقە.[١]
| بەرەی تێکۆشانی دیموکراسی جبھة النضال الديمقراطي | |
|---|---|
| سەرۆک | ئارام کەرکووکی |
| دروشم | دادپەروەری، ئاشتی، ئازادی و پێکەوە ژیان |
| دامەزراندن | ٢٠١٦ (بەرەی دیموکراسی گەل) ٢٠٢١ (بەرەی تێکۆشانی دیموکراسی) |
| پێشینە | بەرەی دیموکراسی گەل |
| شوێنی سیاسی | باڵی چەپ |
| ڕەنگەکان | سوور، زەرد، کەسک، شین، سپی |
| ماڵپەر | |
| https://j-alnidhal.com | |
ناو دەستکاری
لە سەرەتادا ناوی ڕێکخراوەکە بەرەی دیموکراسی گەل بوو، بەڵام بە ھۆی ئەوەی کە ڕێکخراوەیەکی دیکە ھەر بەم ناوە لە وڵاتی عێراق ھەبوو، ناوەکەی گوڕدرا بۆ بەرەی تێکۆشانی دیموکراسی.[١]
مێژوو دەستکاری
بەرەی تێکۆشانی دیموکراسی لە ٢٥ی ئەیلوولی ساڵی ٢٠١٦ لەژێر ناوی بەرەی دیموکراسی گەل دامەزرا.[٢] بەڵام بەھۆی ئەوەی کە ڕێکخراوەیەکی دیکە لەژێر ئەو ناوە ھەبوو نەیتوانی مۆڵەتی چالاکی وەربگرێت. بەدوای ئەوە دامەزرێنەرانی بەرەی دیموکراسی گەل ناوی ڕێکخراوەکەیان گۆڕاند بە بەرەی تێکۆشانی دیموکراسی و لە ئەکامدا توانیویان لە ١٠ی کانوونی دووەمی ٢٠٢١ لە کۆمیسیۆنی ھەڵبژاردنی عێراق مۆڵەت وەربگرێن.[١]
بەدوای ئەوە کۆنگرەی دامەزراندنی بەرەی تێکۆشانی دیموکراسی لە ٣١ی ئازاری ٢٠٢١ لە ھۆڵی چوارچرا لە شاری کەرکووک بەسترا. ھەڵبژاردنی کەرکووک بۆ ئەم مەبەستە بەم ھۆیە بوو کە کەرکووک لە مێژووی خۆی شارێک بۆ پێکەوەژیانی پێکھاتە و نەتەوە جیاوازەکان بووە و لەو کۆنگرەشدا کورد، عەرەب، تورکمان و نەتەوەکان و باوەڕە جیاوازەکان پێکەوە تێیدا بەشدار بوون.[١]
ئامانجەکان دەستکاری
بەرەی تێکۆشانی دیموکراسی تەنیا لە کوردەکان پێکنەھاتووە و بەھۆی ئەوەی کە پێکەوەژیان لە خاڵەکانی سەرەکیی چالاکیی خۆی ھەڵبژاردووە، بۆیە ھەموو پێکھاتەکانی وڵاتی عێراق بریتی لە ھەموو نەتەوە و باوەڕە جیاوازەکان لە بەرەی تێکۆشانی دیموکراسیدا بەشداری دەکەن.[١]
بەرەی تێکۆشانی دیموکراسی لە چوارچێوەی دەستوری عێراقدا چالاکی دەکات و خوازیاری بەدیھێنانی یەکێتییەکی نیشتمانی، دڵنیایی تەندروستی و دادپەروەریی کۆمەڵایەتی، بەھێزکردنی یاساکان و زیندووکردنەوەی ڕاستینەی پەروەردە و فێربوونە. جگە لەمانە بەرەی تێکۆشانی دیموکراسی بۆ ڕەخساندنی ھەلی کار بۆ گەنجان و ھاتنەپێشەوەی ژنان لە کایە جیاوازەکانی کۆمەڵگادا ھەوڵ دەدات.[١]
محەممەد کیانی، وتەبێژ و یەکیک لە ئەندامانی دەستەی دامەزرێنەری بەرەی دیموکراسی گەل لە ساڵی ٢٠١٦دا لە وەتوبێژ لەگەڵ ڕۆژنیوز سەبارەت بە جیاوازیی بەرەکە تەک ھێزە سیاسییەکانی دیکە گوتی ھەموو حیزب و لایەنەکانی دیکە «دەیانەوێت ریفۆرم لەسەرەوە بۆ خوارەوە بکرێت لەو حاڵەتەشدا بەرژەوەندی خۆیان دەپارێزن، ئێمە دەمانەوێت ریفۆرم لەخوارەوە بۆ سەرەوە بکرێت».[٣] کیانی ھەوەھا گوتی بەرەی دیموکراسی گەل لە دیموکراسی گەل پەیرەو دەکات کە لەگەڵ ئەو دیموکراسییە کە لە باشوری کوردستان پەیڕەو دەکرێت و دیموکراسی تەمسیلی و نوێنەرایەتییە و فەشەلی ھێناوە جیاوازە. بە وتەی محەممەد کیانی بەرەی دیموکراسی گەل باوەڕی بە دیموکراسی ڕاستەوخۆ و لامەرکەزیەت ھەیە و بۆ ئەم مەبەستە دەبێت خەڵک بۆ بەڕێوەبردنی خۆیان ئەنجومەنیان بێت و لەسەر دەسەڵات چاودێری بکەن.[٣]
کۆنگرەکان دەستکاری
- کۆنگرەی یەکەم (دامەزراندن)، ٣١ی ئازاری ٢٠٢١.[٤]
بەڕێوەبەرایەتی دەستکاری
لە کۆنگرەی ٣١ی ئازاری ٢٠٢١دا ئارام کەرکووکی، وەک سەرۆکی بەرەی تێکۆشانی دیموکراسی ھەڵبژێردرا. ھەروەھا ١٢ ئەندامیش وەکوو ئەندامی دەستەی بەڕێوەبەری ھەڵبژێردراون، کە چوار کەسیان ژنن. جگە لەمانە چوار جێگریش بۆ سەرۆکی بەرەکە ھەڵبژێردران.[١]
ڕێگری کردن لە سیمینارەکانی بەرەی تێکۆشانی دیموکراسی دەستکاری
بەرەی دیموکراسی گەل دەیھەویست لە ١٥ی ئاداری ٢٠١٧ لە شاری ھەولێر سیمینارێک سەبارەت بە «چۆنێتی چارەسەرکردنی کێشەکانی نێوان پەکەکە و پارتی» بە بەشداریکردنی عەبدوڵا ئاگرین ئەندامی سەرکردایەتی پارتی و محەممەد کیانی بەرپرسی دەستەی سەرکردایەتی بەرەی دیموکراسی گەل بەڕێوەببات کە لە لایەن ھێزە ئەمنییەکانی حکوومەتی ھەرێم ڕێگریی لێ کرا و سیمینارەکە بەڕێوەنەچوو.[٥]
سەرچاوەکان دەستکاری
- ^ ئ ا ب پ ت ج چ ئاژانسی ھەواڵی ژن (ژنھا): ژنان لەناو بەرەیەکی پێکھاتە جیاوازەکانی عێراقدا خەبات دەکەن، نووسراو لە ١٠ی نیسانی ٢٠٢١؛ سەردان لە ١١ی ئابی ٢٠٢٢.
- ^ کوردیپێدیا: بەرەی دیموکراسی گەل، نووسراو لە ٢٦ی ئەیلوولی ٢٠١٦؛ سەردان لە ١٠ی ئابی ٢٠٢٢.
- ^ ئ ا ڕۆژنیوز: کیانی: بەرەی دیموکراسی گەل ئیرادە بۆ کۆمەڵگا دەگەڕێنێتەوە، نووسراو لە ٣ی تەممووزی ٢٠٢٠؛ ٢٤ی تشرینی یەکەمی ٢٠٢٠ لە وەیبەک مەشین، ئەرشیڤ کراوە. سەردان لە ١١ی ئابی ٢٠٢٢.
- ^ بەرەی تێکۆشانی دیموکراسی: بەرەی تێکۆشانی دیموکراسی کۆنگرەی دامەزراندنی خۆی بە ئامادەبوونی ھەموو پێکھاتەکانی گەلی عێراق بەڕێوەبرد، نووسراو لە ١ی نیسانی ٢٠٢١؛ سەردان لە ١١ی ئابی ٢٠٢٢.
- ^ میللەت پرێس: عەبدوڵا ئاگرین: پارتی ڕێگری نەکرد لە سیمینارەکە حکومەت کردی، نووسراو لە ١٦ی ئاداری ٢٠١٧؛ ١٠ی ئابی ٢٠٢٢ لە وەیبەک مەشین، ئەرشیڤ کراوە. سەردان لە ١١ی ئابی ٢٠٢٢.
